Alex aandika Historia kwa kupanda Jengo la Taipei 101 bila kifaa Chochote

[Kasomi]

Historia mpya imeandikwa katika ulimwengu wa michezo hatarishi baada ya mpandaji maarufu wa miamba kutoka Marekani, Alex Honnold (40), kufanikisha kupanda jengo refu la Taipei 101 bila kutumia kamba wala vifaa vya usalama, hatua inayojulikana kama free solo.

Honnold alikamilisha zoezi hilo kwa muda wa saa 1 na dakika 31, na tukio hilo lilirushwa moja kwa moja kupitia Netflix siku ya Jumamosi, tarehe 24 Januari 2026. Kwa mujibu wa taarifa rasmi, yeye ndiye mtu wa kwanza anayejulikana kupanda jengo la Taipei 101 bila aina yoyote ya kinga au vifaa vya usalama.

Jengo la Taipei 101, lenye ghorofa 101 na urefu wa futi 1,667, ni miongoni mwa majengo marefu zaidi duniani. Honnold alieleza katika mahojiano na CNN kuwa alikuwa na ndoto ya kupanda jengo refu kwa mtindo wa free solo kwa takribani miaka 10, akisema changamoto ya jengo ni tofauti kabisa na ile ya miamba ya asili.

Hapo awali, Honnold alitengeneza historia mwaka 2017 baada ya kupanda mlima wa El Capitan wenye urefu wa takribani futi 3,000 katika Hifadhi ya Taifa ya Yosemite bila vifaa vya usalama—tukio lililomfanya atambulike duniani kote.

Kabla ya Honnold, mpandaji majengo wa Ufaransa Alain Robert (63), anayefahamika kama “French Spiderman”, aliwahi kupanda Taipei 101 mwaka 2004 wakati wa ufunguzi wa jengo hilo, ingawa kwa mtindo tofauti. Robert alishiriki kutoa maoni wakati wa matangazo ya moja kwa moja ya CNN wakati wa jaribio la Honnold.