Mwimbaji maarufu Dua Lipa aifungulia kesi kampuni ya Samsung akidai fidia ya dola milioni 15 kwa kutumia sura yake bila makubaliano

[Kasomi]

Mwimbaji maarufu Dua Lipa ameripotiwa kuifungulia kesi kampuni ya teknolojia ya Samsung akidai fidia ya angalau dola milioni 15 kwa madai ya kutumia sura na taswira yake kutangaza televisheni bila idhini yake rasmi.

Kwa mujibu wa nyaraka za kesi zilizoripotiwa na vyombo vya habari vya burudani, Dua Lipa anadai kuwa picha na mwonekano wake vilitumika katika kampeni za matangazo ya bidhaa za Samsung bila makubaliano ya kisheria au malipo yoyote, jambo ambalo mawakili wake wanasema ni ukiukwaji wa haki zake za kibiashara na matumizi ya jina lake kwa faida ya kampuni.

Timu ya sheria ya msanii huyo inaeleza kuwa matumizi ya sura yake kwenye matangazo hayo yanaweza kuwafanya watu kuamini kuwa ana ushirikiano rasmi wa kibiashara na Samsung, jambo ambalo linaweza kuathiri thamani ya chapa yake binafsi pamoja na mikataba mingine ya matangazo anayofanya na kampuni tofauti.

Hadi sasa, Samsung haijatoa maelezo ya kina kuhusu kesi hiyo, lakini taarifa zinaeleza kuwa kampuni hiyo inapitia madai hayo kupitia timu yake ya sheria.

Kesi hiyo imezua mjadala mkubwa kuhusu matumizi ya sura za watu maarufu katika matangazo na umuhimu wa kupata ruhusa rasmi kabla ya kutumia taswira za wasanii kwa shughuli za kibiashara.